RSS

كيلو البصل باتنين جنيه

17 أغسطس

لازال كيلو البصل مرابطا عند سعره – 2 جنيه
في فاكهة أرخصبالمناسبة الفاكهة السنة دي احسن من السنة اللي فاتت يمكن عشان قللوا المواد المسرطنة – بس يوسف عبد الرحمن و راندا الشامي طلعوا م السجن وفقا لقانون الحبس الاحتياطي الجديد – خيبة ليرجعوا يشتغلوا تاني ف المواد المسرطنة بقى و ما نلاقيش حاجة ناكلها السنة الجاية
وبالمناسبة برضه البطاطس ب3جنيه
وفي بطاطس وحشة قوي ب2ونص زي الحاجات الصيني – 2ونص تعالى بص
بلاش تشتروها لانها للتحمير و انتوا عارفين ان البطاطس نشويات و ها تتحمر في زيت- دهون- و ده كله شيء سيء ومضر للصحة – عامة انا بقول لكم على سغعر البطاطس لمجرد المعرفة لكن لا انصح بها على الاطلاق حتى لو انخفض سعرها لسعر الطماطم – جنيه و نص -…
وآخر خناقة كنت طرفا فيها كانت مع سواق ميكروباص حيث تحالف معي عدد من الركاب – و هو أمر تكرر كثيرا في الأيام الماضية- و رفضنا زيادة الأجرة عن المقرر
قعدنا نفهم الاخ السواق ان المنشور بيقول- كلمة المنشور دي معناه بيان الحكومة حسب ما قال الناس- ان المسافة اللي اكتر من 25 كيلو تزيد عشرة ساغ
وهو يقول لأ كل 25 كيلو موش عارف ايه
المهم يعني وصلت في النقاش لأن موش ذنبنا ان الحكومة رفعت البنزين و هو قبل الزيادة فمفروض برضه يقبل منشور زيادة البنديرة بحذافيره -طبعا انا ما قلتلوش حذافيره
الصراحة كان الحوار لطيف قوي
دونته في مذكراتي
فكرني بيوم ماكنا رايحين ندفع الفاتورة بتاعة التليفونات و الناس عمالة تشتم في الزيادة الجديدة في الرسوم الخ لكن برضه بتتخانق و عايزة تدفع بسرعة
قلبهم على الحكومة و خايفين لتشيل العدة
ايه الي انا بكتبه ده ؟
ماعلينا
أسعار كل شيء عمالةبتزيد بشكل غريب و الحاجة اللي بيزيد تمنها ما يرجعشي تاني
كان في زمان قاعدة اقتصادية كده ان في سلع لو زاد تمننها بنسبة ما عالية فمن المستحيل انها تتراجع لمستويات اقل
واضح ان القاعدة دي مطبقة حاليا لكن حتى الزيادات القليلة بنسب محدودةبرضه ستبقى ثابتة و لن تعود لمستويات اقل
خلينا نشوف تاثير زيادة الاسعار الشهور اللي فاتت دي ها يكون ايه وخصوصا ان رمضان قرب و المدارس على الابواب و الدروس الخصوصية برضه
خلي الصراع ينضج بقى براحته
عامة موش ها اسيب البلد دي
انا مغروسة فيها بجالوص طين
وفي رواية أخرى جلة
– الجملتين دول بداية التدوينةالجاية
باي باي

 
أضف تعليقاً

Posted by في 17 أغسطس 2006 in Egypt, Human.Rights

 

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

 
%d مدونون معجبون بهذه: