RSS

عن التصعيد بين مصر والجزائر: أمخاخ متركبة شمال

18 نوفمبر
الاخوة من دعاة مبادارت التهدئة بين مصر والجزائر على الانترنت …كتر ألف خيرهم .بقولها بجد لأن الأامور ماشية في اتجاه غريب….بس بلاش جلد للذات، وبلاش التفاؤل المفرط في نتيجة مبادارت اليكترونية..
نظرة مقارنة وبتقييم عام هتلاقي ان الجانب الجزائري عنده ناس زي عمرو اديب و أمثاله*، ويمكن أسوأ ، بس موش كلهم في الاعلام المرئي(التلفزيونات يعني)بداية من بعض الصحافيين اللي وصلوا في الخبث لدرجة انهم فبركوا صور قتلى وقالوا الحقو المصريين قتلوهم !وبعض مشاغبي الملاعب او المعتدين على المواطنين المصريين وممتلكات مصرية هناك، وصولا لوروارة اللي مرضيش يسلم على زاهر ف الخرطوم ..ايه الاخلاق العالية دي ..يعني ادعوا للتهدئة وكل حاجة بس خدوا بالكوا من حاجتين: الفئة المخاطبة بهذه الدعوات حسب مكان نشرها: يعني غالبا بيعرفوا يقروا ويكتبوا ويستخدموا انترنت كمان ..وغالبا واحد كده وبرضه متعصب، يبقى موش هاتفرق معاه كتير مبادرة اليكترونية – ع الانترنت وشوية جرايد تكتب عنها- للتهدئة.ها تعمل له ايه ؟ سوا مصري ولا جزايري: واحد مخه متركب شمال؟اللي بيضربوا بقى ف ماتش ولا بعده دول فئة تانية ..متعصبين او بلطجية زي بتوع الانتخابات كده، بس سوقهم ف اوقات تانية.

لما اتضرب الباص الجزايري ..مشاهدتي للفيديو واعتقادي ان موش ممكن كل اللي ف الباص يجمعوا على النصب خلتني اصدقه وابعت رسائل اعتذار لاصدقاء جزائريين، وشفت الماتش مع عوائل جزائرية ..لا ضربوني ولا ضربتهم ..اه في واحدة منهم بعد الماتش وبعد ما مصر غلبت هي نادت عيالها وع الباب طوالي وما سلمتش حتى علينا، ..بس الصراحة عيالها اخلاقهم افضل من كده وعندهم ذوق..خلاص؟ اثبتنا القاعدة البسيطة ان موش كل الناس زي بعضها؟ الحكاية محتاجة نجيب مليون دليل بقى ؟بالاضافة الى ان المبادرة بالتهدئة باستخدام كلام حلو واستعراض تاريخ او حتى مستقبل مشترك الخ موش زي ما تعمل تحديد جاد للمشكلة وجوانبها وازاي متتكررش عشان يبقى الحل حل موش تهدئة ودمتم.

اما الشتايم عبر الانترنت بالصور والكلام ..فمش متابعة كويس الجانب الجزائري في هذا الصدد( حلوة الصدد دي؟) بس في سخافات من عندنا وبذاءات كتير .. شفت قناتين جزائريتين ع الدش..لقيتهم بيتكلموا ف حاجات تانية خالص او بيتكلموا بلغات أخرى فقلبت على طول. فمعرفش بيعملوا ولا بيقولوا ايه .النقطة التانية اللي بديت بيها : التجني والاعتدءات على مصريين وممتلكات عائدة لشركات مصرية – يعني اعتداءات عملية بالصلاة ع النبي موش اللفظية- من البعض في الجزائر اكثر حتى الآن من الجانب المصري..يمكن مافيش حكومة عندهم تمنع الاعتداءات ع المصريين او غيرهم؟ يكونش لسه فاكرين الامور سايبة زي التسعينات مثلا؟ امال بوتفليقة ده موش بيشتغل في وظيفة رئيس ولا ايه الحكاية؟احنا عندنا هم ما يتلم..كفاية ان كل القنوات الارضية باستثناء القناة الاولى ها تذيع الماتش..طب لو حصل حاجة ف البلد؟ دوا ناقص؟ زلزال؟ حجر وقع م الدويقة؟ الحكومة عاوزة تقول لنا حاجة ؟ ها تقولها لنا عبر انهي قناة ؟ ايه: للدرجة دي احنا اتهبلنا؟*ياريت بعد المولد بتاع الماتش، نفعل عمل المرصد الاعلامي لمتابعة تجاوزات أو لا مهنية بعض وسائل الاعلام المصرية في قضايا أخرى ..

 

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

 
%d مدونون معجبون بهذه: